Advänts-Spielgruppe

​

Während villne Jahr, han ich mini eige Spielgruppe gleitet. Es hätt mir immer sehr vill Freud gmacht, d'Chind imene uf ihri Bedürfnis apasste Umgäbig z begleite, az'rege, sie i ihrer Fantasie und Ernsthaftigkeit z erlebe. Ich freue mich riesig, dass ich im Gwächshuus wieder en Platz gfunde ha, wo ich miner Passion cha nagah. D'Adväntsspielgruppe söll de Start sii für themebezogeni Chindergruppe, bi Bedarf au durchgehend durs ganze Jahr.

A  de vier Dunnschtigmörge wird zum Thema Advänt baschtlet, mer losed Wiähnachtsgschichte und singed passendi Lieder, aber au Verchleide, spille, zäme Znüniässe söll Platz ha. 

Am erschte Spielgruppemorge am  28.November sind Mami oder Papi herzlich igade, mit eus z'starte, damit sich d'Chind uf die neu Umgebig  sicher chönd ilaa. Nach em Kännelerne dörfed sich d Eltere nach eigener Ischätzig verabschiede. Mengisch gits chli Trännigsschmerz, für de Fall dörf mer sich s mit eme Kafi au gern i de Brocki gmüetlich mache.